മന്ത്രി മോന്സ് ജോസഫ് മുന്കൈയെടുത്തു
പാലാ: മന്ത്രി മോന്സ് ജോസഫ് മുന്കൈയെടുത്തതോടെ കിടങ്ങൂര് മോനിപ്പള്ളി വളവിലെ സ്ഥിരം വെള്ളക്കെട്ടിന് പരിഹാരമാകുന്നു. മോനിപ്പള്ളി വളവ് മുതല് കൊച്ചുപാലം തോടുവരെ ഓട നിര്മിച്ച് വെള്ളം ഒഴുക്കിക്കളയാനാണ് തീരുമാനം.
കിടങ്ങൂര്-അയര്ക്കുന്നം റോഡിലെ മോനിപ്പള്ളി വളവിലെ വെള്ളക്കെട്ട് യാത്രക്കാരെയും പ്രദേശവാസികളെയും ഏറെ ദുരിതത്തിലാക്കിയിരുന്നു. നേരിയ മഴ പെയ്താല് പോലും അര കിലോമീറ്ററോളം ദൂരത്തില് റോഡില് വെള്ളം കെട്ടിക്കിടക്കുന്ന സ്ഥിതിയാണ് ഇവിടെ. കഴിഞ്ഞ ദിവസം കനത്ത മഴയെത്തുടര്ന്ന് മുട്ടൊപ്പം വെള്ളമുയര്ന്നിരുന്നു. അശാസ്ത്രീയമായ റോഡ് നിര്മാണവും ഇവിടെയുണ്ടായിരുന്ന സ്വാഭാവിക തോടുകള് നികത്തപ്പെട്ടതുമാണ് പ്രശ്നം രൂക്ഷമാകാന് കാരണമായതെന്ന് കഴിഞ്ഞ ദിവസം റിപ്പോര്ട്ട് ചെയ്തിരുന്നു.
റോഡിന്റെ വശത്ത് മോനിപ്പള്ളി വളവ് മുതല് അര കിലോമീറ്ററോളം ദൂരത്തില് ശാസ്ത്രീമായ രീതിയില് ഓടകള് നിര്മിച്ച് മഴവെള്ളം കൊച്ചുപാലം തോട്ടിലേക്ക് ഒഴുക്കിവിടുന്ന പദ്ധതിയാണ് പൊതുമരാമത്ത് വകുപ്പ് നടപ്പാക്കാനുദ്ദേശിക്കുന്നത്. മന്ത്രി മോന്സ് ജോസഫിന്റെ നിര്ദേശപ്രകാരമാണ് പൊതുമരാമത്ത് വകുപ്പ് ഉദ്യോഗസ്ഥര് കഴിഞ്ഞ ദിവസം സ്ഥലം സന്ദര്ശിച്ച് നടപടികള് ആരംഭിച്ചത്.
കിടങ്ങൂര് പഞ്ചായത്ത് പ്രസിഡന്റ് ഗീത സുരേഷ്, ബ്ലോക്ക് പഞ്ചായത്തംഗം ബോബി തോമസ്, വൈസ് പ്രസിഡന്റ് നീലകണ്ഠന് നമ്പൂതിരി, പഞ്ചായത്തംഗങ്ങളായ ദീപു തേക്കുംകാട്ടില്, സതീഷ് നിലയം, മഹേഷ്, മുന് ബ്ലോക്ക് പഞ്ചായത്തംഗം മേഴ്സി ജോണ്, വിവിധ കക്ഷി നേതാക്കളായ വി.കെ. സുരേന്ദ്രന്, കെ.ആര്. സുകുമാരന് നായര്, പി.ടി. ജോസ്, പരിസ്ഥിതി പ്രവര്ത്തകന് ഡോ. എസ്. രാമചന്ദ്രന് നായര്, പ്രദേശവാസികള് എന്നിവര് ഉദ്യോഗസ്ഥരോടൊപ്പം ചര്ച്ചകളില് പങ്കെടുത്തു.
Deepika
E-paper LOGIN
LOGIN
